al 2000 pe prime volte, sintint une regjistrazion di musiche antighe, o soi restât cjapât dal sunôr di une cuarnamuse. Prime che al finìs l'an dopo, o soi rivât a cjatâ un bon liutâr, mi soi fat fâ un strument e o ai scomençât a sunâlu,... ciert... "sunâlu", par dî cussì, a mût gno. Ognidun che al vedi un pocje di pratiche cun chescj struments o crôt che al vedi capît di ce che o feveli. I sunadôrs di cuarnamuse a àn ducj un lôr lengaç particolâr ma, lis personis che a tegnin tai braçs i struments pe prime volte, a àn par dut il mont il stes stîl e si rive subit a inacuarzisi di chest.
Jo no soi stât di mancul.
O ai vût però la fortune di incuintrâ lant indenant tal timp bogns musiciscj e vuê come vuê a son diviers agns che o suni chescj struments ancje par profession.

 

crôt che l'interès pe costruzion al sedi nassût tal dì stes che o ai vût tes mans la prime cuarnamuse. Al è di strani cemût che chescj struments a cjapin afiet par cui che al à une vocazion pai lavôrs artesanâi. O crôt che al sedi cussì ancje par me dal moment che, cualchi mês dopo, o ai vût la fortune di jessi stât acetât tant che garzon te buteghe di un artesan che al faseve cuarnamusis francesis.
No finirai mai di ringraziâ chel gno bon Mestri.
O ai imparât a lavorâ materiâi naturâi, a capî lis carateristichis des diviersis sostancis, a distrigâmi jenfri un mâr di imprescj e chel che al vâl di plui, o ai capît che chel lavôr mi varès compagnât ancjemò par tant timp.

i chê volte in ca o ai viodût cetancj laboratoris sedi di cuarnamusis che di pivis, o ai cjapât part a cors di tornidure artistiche e o ai scomençât a lâ ator in Italie, in Gjermanie e in France par scoltâ i struments di chescj paîs, par capînt la poetiche e pierdimi jenfri lis abilitâts artesanâls grandononis dai diviers liutârs.
Tal 2006 o ai scomençât a furnî un gno laboratori personâl e cumò, dopo di une dade di sperimentazion, o ai pensât di meti adun, tes pagjinis che a son chi, i risultâts di chescj agns.

lenghe.net